Kryetari i Lidhjes Demokratike të Kosovës, Lumir Abdixhiku, ka dalë me një reagim politik ku ka ritheksuar identitetin rugovist të LDK-së, raportin me Shtetet e Bashkuara të Amerikës dhe qëndrimin e partisë ndaj UÇK-së, ndërsa një pjesë të përgjegjësisë për situatën institucionale ia ka atribuar mospranimit të propozimeve të partisë së tij.
“Të jesh LDK do të thotë ta mbash kokën lart dhe ta dish rrugën tënde. Rrugën e Ibrahim Rugovës. Të Kosovës së lirë, të pavarur e në miqësi të përhershme me Amerikën”, ka shkruar Abdixhiku.
Ai ka theksuar se UÇK-ja, sipas tij, është pjesë edhe e historisë së LDK-së dhe ka kundërshtuar përpjekjet që patriotizmi apo historia e luftës të monopolizohen nga një subjekt apo grup i caktuar.
“UÇK-ja është edhe gjaku ynë. Me Amerikën e NATO-n na lidh vetë liria. Asnjë tregtari patriotizmi nuk ia lejojmë ta përvetësojë historinë që e bëmë bashkë”, ka deklaruar ai.
Abdixhiku ka përdorur edhe gjuhë të fortë ndaj kritikëve të partisë.
“Kemi rrënjë të forta. Etiketimet nuk na e ndryshojnë bindjen. Kërcënimet nuk na e përcaktojnë qëndrimin. Na keni ngatërruar me mercenarët”, ka shkruar ai.
Një pjesë e reagimit lidhet drejtpërdrejt me krizën rreth zgjedhjes së presidentit. Abdixhiku kishte propozuar Bekim Sejdiun si kandidat për president, por gjashtë deputetë të LDK-së kishin deklaruar se nuk do ta mbështesnin kandidaturën, duke e bërë të pasigurt arritjen e votave të nevojshme.
Në reagimin e fundit, Abdixhiku ka thënë se, po të ishte dëgjuar vizioni i LDK-së, Kosova sot do të kishte president dhe, sipas tij, një balancë më të madhe institucionale.
“Po të ishte dëgjuar vizioni ynë, sot do të kishim President dhe stabilitet balancues. Kosova do të kishte angazhim institucional për mbrojtjen e së vërtetës së luftës tonë në botë”, ka shkruar ai.
Ky qëndrim lidhet edhe me deklaratat e tij të mëhershme, kur Abdixhiku kishte argumentuar se zgjedhja e Sejdiut do të sillte “balancë institucionale” dhe do të shmangte zgjedhjet e reja.
Por propozimi nuk kishte marrë mbështetjen e plotë as brenda vetë LDK-së, ndërsa më 15 shtator bisedimet për presidentin u raportuan si të pezulluara pas tërheqjes së Sejdiut nga kandidatura.
Abdixhiku ka pretenduar se propozimet e LDK-së “u luftuan me çdo mjet”, duke e lidhur këtë me mungesën e institucioneve dhe të kohezionit politik.
“Nuk u dëgjua. U luftua me çdo mjet! Ja ku mbetëm sot. Pa institucione, pa mundësi mbrojtjeje, pa kohezion minimal në vend”, ka shkruar ai.
Reagimin e ka mbyllur me një pyetje politike:
“Çështja është, kujt i shërbyen, në të vërtetë?”
Burimi origjinal
Ky tekst publikohet nga Redaksia e Raporti Sot me leje/licencë. Burimi origjinal është i lidhur më sipër.
