Dogana e Kosovës ka njoftuar se gjatë një operacioni të zhvilluar më 23.10.2026 ka zbuluar 113 telefona mobilë të dyshuar si të kontrabanduar.

Sipas Doganës, operacioni është realizuar pas pranimit të informatave përmes rrugëve operative, ndërsa fillimisht është kontrolluar një biznes që merret me tregtimin e telefonave mobilë.

Kontrolli më pas është zgjeruar edhe në një banesë në afërsi të biznesit, për të cilën Dogana ka njoftuar se shfrytëzohej për fshehjen dhe ruajtjen e telefonave të kontrabanduar.

“Gjatë kontrollit, zyrtarët doganorë kanë zbuluar 113 telefona mobilë të kontrabanduar, të markave dhe modeleve të ndryshme, përfshirë Apple iPhone, Samsung Galaxy, Xiaomi, Redmi, POCO, Google Pixel, OnePlus dhe Huawei” – thuhet në njoftimin e Doganës së Kosovës, më 24.10.2026.

Sipas Doganës, personi përgjegjës nuk ka poseduar dokumentacion që dëshmon origjinën e ligjshme të telefonave, importimin e tyre përmes procedurave të rregullta doganore apo pagesën e detyrimeve doganore.

Si rezultat i operacionit, të gjithë telefonat janë ndaluar nga Dogana e Kosovës, ndërsa ndaj personit të dyshuar janë ndërmarrë veprime procedurale.

“Personi i dyshuar është intervistuar nga zyrtarët kompetentë dhe, me urdhër të prokurorit të rastit, është liruar për t’u proceduar në procedurë të rregullt” – thuhet tutje në njoftim.

Burimi origjinal

Ky tekst publikohet nga Redaksia e Raporti Sot me leje/licencë. Burimi origjinal është i lidhur më sipër.