Kryeministri i Shqipërisë, Edi Rama, ka premtuar rritje të konsiderueshme të pagave për efektivët e Policisë së Shtetit nga 1 janari, në kuadër të buxhetit të ri.

Gjatë një konference për mediat me forcat e Policisë së Shtetit, Rama pranoi se pagat e policëve nuk janë rritur në masën e duhur ndër vite, duke theksuar se qeveria synon të përmirësojë ndjeshëm trajtimin financiar të tyre.

“Me buxhetin e ri, nga 1 janari, paga juaj do të rritet në mënyrë të konsiderueshme”, deklaroi Rama.

Kreu i qeverisë bëri të ditur gjithashtu se do të vihen në dispozicion 2,500 euro për çdo efektiv të angazhuar në front, duke shpjeguar se kjo shumë do të jetë e njëjtë për të gjithë, pa bërë dallime mes tyre.

“Jeni një, dhe një për të gjithë. Shteti do ta fitojë këtë betejë”, u shpreh Rama, duke shprehur mbështetjen e tij për efektivët e Policisë së Shtetit.

Deklaratat vijnë në një kohë kur në Tiranë po zhvillohen protesta të dhunshme, gjatë të cilave janë shënuar përplasje mes protestuesve dhe policisë.

Burimi origjinal

Ky tekst publikohet nga Redaksia e Raporti Sot me leje/licencë. Burimi origjinal është i lidhur më sipër.