Prishtinë – “Institucionet nuk janë pronë private” ishte një nga mesazhet e Lëvizjes Revolta gjatë aktivitetit të zhvilluar para Ministrisë së Punëve të Brendshme.
Lëvizja kërkoi që MPB-ja të bëjë publik numrin e personave me përkatësi serbe që kanë aplikuar për shtetësinë e Kosovës pas hyrjes në fuqi të Ligjit të ri për Shtetësinë.
Sipas përfaqësuesit të Revoltës, Rilind Kuçi, organizata fillimisht ka zgjedhur rrugën institucionale duke i kërkuar ministrisë informacionin përmes kërkesës për qasje në dokumente publike.
Por, sipas tij, mungesa e përgjigjes ka bërë që çështja të çohet në hapësirën publike.
“Ne kemi reaguar direkt tek Ministria e Punëve të Brendshme”, tha Kuçi, duke shtuar se sipas tij kishin kaluar afatet ligjore për përgjigje.
Aktiviteti i 16 qershorit u cilësua nga Revolta si simbolik, ndërsa Kuçi paralajmëroi se në rast të mungesës së reagimit, lëvizja mund të kalojë në organizimin e protestave.
